ნაგებობა სამეკლესიიანი ბაზილიკაა (11,1X10,7 მ), აგებულია ქვიშაქვის ერთნაირი კვადრებით. სამხრეთის ეკლესიის დიდი ნაწილი და ჩრდილო-დასავლეთის სათავსის სახურავი დაზიანებულია. ლავგარდანი მხოლოდ შუა ეკლესიას აქვს. XVIII-XIX საუკუნეებში შუა ეკლესიას დასავლეთიდან ორი კონტრფორსი მიუშენებიათ და სახურავი განუახლებიათ. შუა ეკლესიის შესასვლელი სამხრეთიდანაა. მისი ღრმა ნახევარწრიული აფსიდი ერთ სარკმელს და ჩრდილოეთის და სამხრეთის ეკლესიებში გასასვლელ ორ კარას მოიცავს. დარბაზის კამარა ორი საბჯენ თაღზეა დამყარებული, ხოლო დასავლეთის თაღის საყრდენად დაკიდული პილასტრებია გამოყენებული. პილასტრებს მარტივი თაროსებრი კაპიტელები აქვთ. კედლებზე, პილასტრებს შორის, თითო დეკორატიული თაღი გადადის. სამხრეთ კედელში ორი პარალელურწირხლებიანი სარკმელია. დასავლეთ კედელში ხის ძელებზე მოწყობილი პატრონიკეს კვალია შემორჩენილი. სამხრეთის ეკლესია მოგვიანებით სადიაკვეთ გადაუკეთებიათ და ის შუა ეკლესიას თაღოვანი კარით უკავშირდება. ჩრდილოეთის მოკლე სწორკუთხა ეკლესია ცილინდრული კამარითაა გადახურული, და მასში შესვლა შუა ეკლესიის აღმოსავლეთ ნაწილში გაჭრილი კარით ხდება. მოგვიანებით ეს სათავსი სამკვეთლოდ გადაუკეთებიათ. სათავსის ერთადერთი სარკმელი აღმოსავლეთის კედელშია. ჩრდილოეთის კედელს მთელ სიგრძეზე 0,2 მ სიგანის საფეხური გასდევს. აღმოსავლეთ ნაწილში ერთი სწორკუთხა ნიშია. სამხრეთის კედელში, კამარის ქუსლში, გაჭრილია მთავარი ეკლესიის კონქის თავზე მოწყობილი სამალავში ასასვლელი. შუა ეკლესიის ჩრდილოეთის კედელზე დამოუკიდებელი სწორკუთხა სათავსი მიუშენებიათ, რომელსაც დასავლეთით სწორკუთხა კარი აქვს. კარის თავზე არქიტრავით გადახურული სარკმელია. აღმოსავლეთისა და ჩრდილოეთის კედლებში თითო სწორკუთხა ნიშია. ფასადებიდან საუკეთესო აღმოსავლეთ ფასადია, შუა ეკლესიის სარკმლის თავზე ქვიშაქვის ფილაზე, წრეში ჩასმულია თანაბარმკლავებიანი ჯვარი. სამხრეთის ეკლესიის სარკმელი ძალიან დაზიანებულია. ჩრდილოეთის ეკლესიის სარკმლის ზემოთ, ქვაზე გამოსახულია რელიეფური ჯვარი. შუა ეკლესიის განიერი ლავგარდანი შედგენილია თაროს, წრეთარგისა და ლილვისაგან. ეკლესიის გარშემო შემორჩენილია ქვის გალავანის ფრაგმენტები.
