ჩიხის სამების ეკლესია არის არქიტექტურული ძეგლი, რომელიც საჩხერის მუნიციპალიტეტის სოფელ ჩიხაში, სოფლის ცენტრში, ახალ სასაფლაოზე მდებარეობს. ეკლესიის ზომებია 21X10 მ. შენობის ცენტრალური ნაწილი სწორკუთხა, გრძელყოფილი დარბაზია, რომელსაც აღმოსავლეთით სწორკუთხა საკურთხეველი და დასავლეთით კვადრატული გეგმის ორსართულიანი სამრეკლო ეკვრის.
გრძივი კედლების ცენტრალურ ნაწილებში თითო ნაოთხალიანი, თაღოვანი კარი გაჭრილია, რომლის ორივე მხარეს თაღოვანი სარკმლებია. საკურთხეველს დარბაზი სამი ფართო, თაღოვანი გასასვლელით უკავშირდება, რომელთაგან შუათანა უფრო ფართოა. საკურთხევლის სამივე კედელში თითო სარკმელია გაჭრილი. საკურთხეველი დარბაზის განივ კედელზე უფრო მოკლეა, რის გამოც მის ჩრდილო და სამხრეთი კედლებთან თითო საფეხურს ქმნის. დარბაზი ასევე იყო დაკავშირებული სამრეკლოს პირველ სართულთან ფართო გასასვლელით.
სამრეკლოს პირველი სართული კვადრატული გეგმარებისაა, დასავლეთიდან თაღოვანი კარით და ჩრდილოეთ და სამხრეთ მხრიდან თითო თაღოვანი სარკმლით, ხოლო მეორე სართული სვეტებზეა მიყრდნობილი. სამ მხარეს თაღებით გახსნილი ფანჩატურია. სამრეკლოს ოთხფერდა სახურავი თუნუქით არის დაფარული. ეკლესიის ინტერიერი მოხატულია, იატაკი კი დამუშავებული თლილი ქვისაა, ხოლო გუმბათის შიდა მხარე ხითაა მოპირკეთებული. ექსტერიერის მხატვრული სახისთვის გამოყენებულია მრავალი არქიტექტურული დეტალი, რაც ხაზს უსვამს და გამოკვეთავს ყველა კონსტრუქციულ ნაწილს. განსაკუთრებული ყურადღება ექცევა სამი ძირითადი მასის ურთიერთობას: ყველაზე დიდი ზომის და გაფორმებული დარბაზი, მცირე ზომის და სადა საკურთხეველი, და ვიწრო, მაღალი და დინამიური სამრეკლო.
