სამრეწველო მშენებლობა "Hunan Road & Bridge Construction Group-Georgia"

ჩინურმა კომპანია Hunan Road and Bridge Construction Group Co Ltd-მა ოფიციალურად დაარეგისტრირა თავისი წარმომადგენლობა საქართველოში 2019 წლის 10 მაისს სახელწოდებით “Hunan Road and Bridge Construction Group Ltd”. მანამდე, 2018 წლის 28 ნოემბრიდან კომპანია უკვე დარეგისტრირებული იყო საქართველოს სახელმწიფო შესყიდვების ერთიან პორტალზე. საქართველოს საჯარო რეესტრის მიხედვით, კომპანია ფლობს არასასოფლო-სამეურნეო დანიშნულების 43 059.00 კვ.მ მიწის ნაკვეთს ქალაქ ხაშურში, ბორჯომის N2 მისამართზე.

კომპანიამ ყურადღება მიიპყრო E-60 საავტომობილო გზის ხევი-უბისა (F2) მონაკვეთის მშენებლობაზე ტენდერში გამარჯვებით, რომელიც წარმოადგენს საქართველოს აღმოსავლეთ და დასავლეთ ნაწილებს დამაკავშირებელი მნიშვნელოვანი 51,6 კმ ავტომაგისტრალის ნაწილს. მაგისტრალის ამ და სხვა მონაკვეთებს სახელმწიფო ჩინური კომპანიები აშენებენ. პროექტი აზიის განვითარების ბანკის დაფინანსებით ხდება და პროექტის ჯამური ღირებულება შეადგენს 732,296,478.02 ლარს.

სამუშაოების ტენდერში ათმა პრეტენდენტმა მიიღო მონაწილეობა, ხოლო Hunan Road and Bridge Construction Group Co Ltd ტენდერში ყველაზე დაბალი ფასის შეთავაზებით გაიმარჯვა. სამწუხაროდ, დეტალური ინფორმაცია შერჩევის პროცესისა და კომპანიის მიერ წარმოდგენილი დოკუმენტაციის საქართველოს მთავრობის ელექტრონული შესყიდვების სისტემაში შესაბამისობის შესახებ არ არის ხელმისაწვდომი. ამ ინფორმაციას საქართველოს საავტომობილო გზების დეპარტამენტიც არ აწვდის, ვინაიდან დამატებების მოთხოვნა მხოლოდ ტენდერში მონაწილე ორგანიზაციას შეუძლია.