წმინდა ნინოს ეკლესია ქვაბთაკერში, სოფელ ბრილში

ქვაბთაკერის წმინდა ნინოს ეკლესია არის არქეოლოგიური ძეგლი, რომელიც მდებარეობს ხაშურის მუნიციპალიტეტის სოფელ ბრილის დასავლეთ ნაწილში, ქვაბთაკერის ღელის ნაპირას. დასავლეთ კედელში არსებული ცხრასტრიქონიანი სამშენებლო წარწერის მიხედვით, ეკლესია აშენდა ერეკლე I მეფობის პერიოდში (1688-1703 წწ.) დიასამიძის მიერ. ის დარბაზული ტიპის (8,3x5,6 მეტრი) და ნაგებია ქვიშაქვის კვადრებით და აგურით. ეკლესია დაზიანებულია: სახურავი, სამხრეთ კედელი და ჩრდილოეთის კედლის ზედა ნაწილი ჩამონგრეულია, ხოლო საპირე ქვები ამოცვენილია. დარბაზი 0,5 მეტრი სიმაღლეზე მიწით არის ამოვსებული, და აქ ხე იყო ამოსული. კონქი და სარკმლის თაღები შეკეთების დროს აგურით ამოუყვანიათ. არსებობს ორი შესასვლელი: სამხრეთით და დასავლეთით. ნახევარწრიული აფსიდის ღერძზე არის თაღოვანი სარკმელი, რომლის გვერდებზე მაღალი თაღოვანი ნიშებია. მსგავსი სარკმელი არის დასავლეთ კედლის ზედა ნაწილში. დასავლეთ შესასვლელს აქვს ოდნავ შეისპული თაღი, რომელიც შედგება ორი თლილი ქვისგან.