უსანეთის ტაძარი სოფელ ალში

❤️

უსანეთის ეკლესია არის არქიტექტურული ძეგლი, რომელიც მდებარეობს ალის სოფლის ჩრდილო-დასავლეთით, ხაშურის მუნიციპალიტეტში. ეს არის სამნავიანი ბაზილიკა (15,2X10,6 მ), ნაგები ნატეხი ქვით, ნაწილობრივ კი თლილი ქვით. ეკლესია დაზიანებულია: სახურავი და კედლების დიდი ნაწილი ჩამონგრეულია. შესასვლელები სამხრეთ და დასავლეთ მხარეებზეა. ნავები ერთმანეთისაგან გამოყოფილია ორი წყვილი ბოძით და მათზე გადაყვანილი თაღებით. კამარები და თაღები ყველგან ისრულია, ხოლო თლილი ქვით გაწვდილი თაღები მარტივი ქვის იმპოსტებზე ეყრდნობა. საკურთხეველი მაღალია და ნახევარწრიული აფსიდი აქვს, რომელშიც დიდი სწორკუთხა სარკმელია. აფსიდის გვერდებზე სამკვეთლო და სადიკავნეა, რომლებიც აფსიდს ღიობით უკავშირდება. შუა ნავის დასავლეთ კედელში ოთხკუთხა სარკმელია. სამხრეთ ნავში და შუა ნავის ზედა ნაწილში - სამ-სამი სარკმელია. ჩრდილოეთი კედლის ნიშში სანათლავია.

სამრეკლო (4,2X4,2 მ) აღმოსავლეთიდან ეკლესიაზეა მიბმული. ის ნაგებია ნატეხი ქვითა და აგურით, ქვედა სართული სამ მხარეს გახსნილია თაღებით. II სართული პირამიდული გუმბათით გადახურული ექვსწახნაგა ფანჩატურია, ხოლო ზარების დასაკიდი გადახურულია კონუსური გუმბათით. ფანჩატურის მასიურ ბოძებს მარტივი კაპიტელები და ბაზისები აქვს. აგურის ლავგარდნის ოთხი მწკრივიდან ორი დაწყობილია კბილანებად.

2006 წელს, საქართველოს პრეზიდენტის ბრძანებულების საფუძველზე, ეკლესიას და მის სამრეკლოს ეროვნული მნიშვნელობის კულტურის უძრავი ძეგლის სტატუსი მიენიჭა.