ქართის ეკლესია სოფელ დიდ ხალებში

არქიტექტურული ძეგლი ხაშურის მუნიციპალიტეტის სოფელ დიდ ხალებში მდებარეობს. ეკლესია სოფლის აღმოსავლეთ ნაწილში, 1.5 კილომეტრში, სოფლებს კრისხევსა და დიდ ხალებს შორის, მაღალ სერზე, სასაფლაოზეა აშენებული. სტილისტური ნიშნებით იგი IX-X საუკუნეებს მიეკუთვნება.

ეკლესია დარბაზული ფორმისაა (10.3 X 4.5 მ), ნაგებია თლილი ქვიშაქვითა და შირიმის ქვით. სამხრეთ-დასავლეთ კუთხეში გვიანდელი მინაშენია, რომლის სიმაღლე დაახლოებით 2.3 მეტრია. შესასვლელები ეკლესიას სამხრეთ და ჩრდილოეთ მხარეს ჰქონდა; ჩრდილოეთი შესასვლელი გადაკეთებულია. აფსიდის ღერძზე ვიწრო თაღოვანი სარკმელია, მსგავსი სარკმელი დასავლეთ კედელშია. აფსიდის ორივე მხარეს თითო პატარა სწორკუთხა ნიშია. დარბაზის გრძივ კედლებზე კამარის საბჯენი თაღის საყრდენი თითო ორსაფეხურიანი პილასტრია. ფასადები კარგად გათლილი შირიმის კვადრებითაა დამზადებული. მინაშენში (5.5 X 6.5 მ) შესასვლელი სამხრეთიდანაა, ხოლო კედლებში თითო ვიწრო სწორკუთხა სარკმელია. ჩრდილოეთ და სამხრეთ კედლებზე შირიმით ნაწყობი საბჯენი თაღის ქუსლის ქვები შემორჩენილია. მინაშენი არაწესიერი ფორმის ნახევარწრიული კამარით არის გადახურული.