მაღრაანის ღვთაება - ტაძარი სოფლის ზემო ნაწილში

ეს არის ულამაზესი და დავიწყებული ადგილი.

შესანიშნავი ადგილი 🌳💛🌳

მაღრაანის ღვთაების ეკლესია ახმეტის მუნიციპალიტეტში მდებარეობს, სოფელ მაღრაანის ჩრდილოეთით 2 კილომეტრში, ტყეში, მდინარე მაჭარეულის მარჯვენა ნაპირზე. ეკლესია XV-XVI საუკუნეებთანაა დაკავშირებული. შენობა მთის ფერდობის ხელოვნურად მოსწორებულ ტერიტორიაზეა განთავსებული, გარშემო კი დაბალი გალავანია.

ეკლესია დარბაზული ტიპისაა და სამხრეთ მხარეს თანადროული მინაშენი აქვს (9,2 X 9,2 მ). შენობა ნატეხი ქვით არის აგებული, ზოგან შირიმიცაა ჩართული. კედლები შიგნიდან და გარედან მობათქაშებულია, ხოლო შესასვლელები დასავლეთ და სამხრეთ მხრიდანაა. ორივე კარი ხის თარაზული გადახურვითაა დაფარული. სამხრეთ კარი სწორკუთხაა, დასავლეთი კი თაღოვანი. აღმოსავლეთ ნაწილში ნახევარწრიული აბსიდიაა, რომლის შუაში მაღალი თაღოვანი სარკმელია.

დარბაზი ნახევარწრიული კამარითაა გადახურული. დასავლეთ კედლზე და გრძივი კედლების აღმოსავლეთ მხარეს თითო თაღოვანი სარკმელია. ეკლესიის ფასადებზე ლავგარდანი მხოლოდ გრძივი ფასადების ნაწილშია. მინაშენი ეკლესიას წყობის გადაბმით უკავშირდება. მოგვიანებით დასავლეთი ნაწილი დაზიანდა და კვადრატული (5 X 5 მ) ორსართულიანი სამრეკლო ააგეს.

სამრეკლოს პირველი სართული ოთხივე მხარეს ბურჯებზე დაყრდნობილი შეისრული თაღებით იყო გახსნილი. მოგვიანებით აღმოსავლეთ და სამხრეთ თაღები მთლიანად აუშენებიათ, ხოლო დასავლეთში სწორკუთხა შესასვლელი გაუკეთებიათ. მეორე სართული აგურით არის ნაგები და რვაწახნაგა ფორმისაა, რომელიც ნახევარსფერული გუმბათით მთავრდება.

გალავანი ქვითკირისაა, მისი ნაწილი კი საყრდენი კედლების როლს ასრულებს. გალავანს ორი შესასვლელი აქვს: აღმოსავლეთ და დასავლეთ მხარეს. კარიბჭე გალავნის სამხრეთ-დასავლეთ კუთხეშია, რომელიც სწორკუთხაა და თითო შესასვლელი აღმოსავლეთ და დასავლეთ მხარეს აქვს.